lshb.ch

Deklarata e Pavarësisë në papirusin e vjetër 700 vjet

BUKURSHKRIMI I PËRJETSHËM

Një papirus 700-vjeçar, i blerë në Londër, ka qenë letra në të cilën është shkruar Deklarata e Pavarësisë së Kosovës. Profesor Shyqyri Nimani rrëfen për "Lajm" ethet e së shtunës gjatë shkrimit me dorë të Deklaratës së Pavarësisë së Kosovës

ANITA KADRIU

Përderisa të gjithë prisnin në ankth çastin historik, profesor Nimani e hidhte tekstin e deklaratës në pergamenën 700-vjeçare. Edhe Kryeministri i Kosovës ishte në ethe. Vetëm 15 minuta para leximit të
Deklaratës së Pavarësisë, Thaçi shkoi sërish për t'u vërtetuar se a është hedhur në pergamenë teksti i deklaratës. Një ditë më vonë profesori i Universitetit të Prishtinës, Shyqyri Nimani, i kujton këto çaste të ankthshme dhe historike. Ai kishte filluar në orën 23.00 të mbrëmjes së 16 shkurtit, një ditë para shpalljes së pavarësisë, në një
nga zyrat e Kryeministrisë të vuloste në pergamenë ëndrrën shekullore të kosovarëve. Nuk ishte mësuar të punojë në një
hapësirë të ngushtë. Por, siç shprehet ai, ishte dëshira e kryeministrit Hashim Thaçi që deklarata të punohej në studion e tij. Vendimi i Thaçit e kishte detyruar profesorin që nga studioja e tij ta transferonte
gjithë materialin punues në ndërtesën e Kryeministrisë. Por, asnjëherë gjatë pesëmbëdhjetë orëve sa ka zgjatur hedhja e shkronjave të pavarësisë në pergamenë, disenjatori i njohur kosovar nuk e ka zhgënjyer besimin e kryeministrit. Pa mëngjes, drekë e darkë, ai nuk ka reshtur së punuari gjatë tërë kohës që ta bënte gati për nënshkrim Deklaratën e Pavarësisë për pasditen e së dielës.
Presioni kohor nuk e tundi asnjëherë që t'i ikte profesionalizimit, por kishte pamundësuar që brenda 15 orëve të bëheshin dy kopje të
deklaratës. "Duhej të ishin dy, por koha ishte e kufizuar, nuk
premtonte më shumë, andaj arrita të përfundoja vetëm një kopje", thotë për "Lajm" profesori i pikturimit të librit në UP dhe ish-themeluesi i Katedrës së Disenjit në këtë universitet.
Pergameni, lëkurë e cila është sjellë nga Anglia, i shkruar me
dorë nga Nimani, i ngjan në formë atij të Shteteve të Bashkuara. "Kjo lëkurë ekziston me mijëra vjet. Edhe ngjyra për shkronja është sjellë po nga Anglia, sepse duhej të ishte e fuqishme që të konsistonte me lëkurën" thotë ai, derisa tregon përpjekjet e tij që në një format pergameni prej 80 me 50 centimetra t'i stoliste katër faqe të
Deklaratës së Pavarësisë.
"Vetëm dy faqe duhej t'i bëja gati, ndërsa para vetes i kisha katër faqe dhe një herë mendova se ishte e pamundur të hidhej në atë madhësi pergameni, gjë që nuk e kisha pritur, sepse zakonisht tekstet janë të shkurtra".
Megjithëse shprehet me modesti se secili artist do ta bënte një gjë të tillë, ai i qëndroi besnik popullit të tij deri në minutat e fundit të shpalljes së pavarësisë, duke e derdhur talentin, njohuritë dhe tërë
energjinë që kjo të bëhej gati për nënshkrim, ashtu siç duhej.
Por, ai e ruajti me respekt konfidencialitetin e tekstit, sepse ishte i shtati në listën e atyre që kishin njohuri për përmbajtjen e deklaratës. Porosia e pergamenit u bë nga Arbër Hadri, drejtor i Muzeut të Kosovës, dhjetë ditë para shpalljes së pavarësisë.
Profesor Nimani e sheh të arsyeshme që kopja e Deklaratës së Pavarësisë të ruhet në thesarin e Kosovës - në muze.

(Gazeta Lajm, 19 shkurt 2008)